नेवाः मिसा दबु गैंडाकोटद्धारा सामूहिक ईहि (बेल विवाह) कार्यक्रम सुरु

गैँडाकोट । नेवाः मिसा दबु गैंडाकोट नगर समितीले परम्परागत संस्कृति संरक्षण तथा प्रवद्र्धन गर्ने उद्देश्यले दुई दिने सामूहिक ईहि (बेल विवाह) कार्यक्रम शनिवारदेखि थालनी गरेको छ । गैँडाकोट-२ स्थित श्रीराम पार्टी प्यालेसमा सुरु गरिएको कार्यक्रममा १७ जना नेवारी कन्याहरूको बेल विवाह गर्न लागिएको जनाइएको छ ।

कार्यक्रमको पहिलो दिन आज नेवारी कन्याहरुले सामूहिक रुपमा गुरुद्धारा विधिपूर्वक पूजा गरेका छन् । भोलि दोस्रो दिन कन्यादान तथा अन्य मुख्य वैदिक विधिहरू  गरिने बताइएको छ ।

नेवार समुदायमा परम्परागत रूपमा कन्या पहिलोपटक रजस्वला हुनु अघि बेलसँग विवाह गरिदिने चलन छ । यसरी बेलसँग विवाह गरिदिएमा पुण्य प्राप्त हुने तथा कन्याले जीवनको एक महत्त्वपूर्ण कर्म पुरा गर्ने विश्वास रहेको नेवाः मिसा दबु गैंडाकोटकी अध्यक्ष सिता श्रेष्ठले बताउनुभयो ।

कार्यक्रमका प्रमुख अतिथि गैंडाकोट नगरपालिकाका नगर प्रमुख मदनभक्त अधिकारीले भाषा र संस्कृतिको संरक्षण प्रत्येक समुदायको दायित्व भएको भन्दै नेवार समुदायले परम्परालाई जगेर्ना गर्न गरेको यो कार्य प्रशंसनीय रहेको बताउनुभयो ।

कार्यक्रममा गैंडाकोट नगरपालिकाका उपप्रमुख शान्ती कोइराला, वडा नं.२ का वडाध्यक्ष प्रकाश सापकोटा, नेवा देय दवु जिल्ला समितिका अध्यक्ष मित्रलाल श्रेष्ठ, गण्डकी प्रदेश सभा सदस्य कृष्ण कुमार श्रेष्ठ लगायतको उपस्थिति रहेको थियो ।

कार्यक्रमको सहजीकरण सर्मिला श्रेष्ठ र सविता श्रेष्ठले गर्नुभएको थियो ।