गैंडाकोटमा नेवाः मिसा दबूद्वारा बेल विवाह सम्पन्न, १७ कन्याहरुले गरे ईही

गैंडाकोट । नेवाः मिसा दबू गैंडाकोट नगरसमितीद्वारा आयोजित दुई दिने ईही (बेल विवाह) कार्यक्रम आइतबार सम्पन्न भएको छ । नेवार समुदायको महत्वपूर्ण सांस्कृतिक एवं धार्मिक परम्परा मानिने बेल विवाहमा १७ जना कन्याहरूले विधिवत् रूपमा विवाह सम्पन्न गरेका हुन्।

नेवार समुदायमा रजस्वला हुनु अघि कन्याहरूको ईही विवाह गरिदिने परम्परा शताब्दीदेखि चलिआएको छ । पहिलो रजस्वला हुनु अगाडि बेलसँग गरिने यस विवाहले कन्यालाई जीवनभर संरक्षण मिल्ने र उनीहरुको सामाजिक-धार्मिक पहिचान मजबुत हुने गर्दछ । दुई दिने विवाहमा पहिलो दिन गुरुद्वारा पूजापाठ गरिन्छ भने दोस्रो दिन बुबाआमाद्वारा कन्यादान गरिन्छ । यसरी बेल विवाहमा कन्यादान गरिसकेपछि पछि विवाहमा कन्यादान गर्न नपर्ने गुवाजु हरिशरणराज उपाध्याय शर्माको भनाई छ ।

नेवाः मिसा दबूले प्रत्येक वर्ष बेल विवाह, यमरी पर्वलगायत सांस्कृतिक गतिविधिहरू निरन्तर सञ्चालन गर्दै आएको नेवाः मिसा दबू गैंडाकोटका अध्यक्ष सिता श्रेष्ठले बताउनुभयो ।  पहिलो रजस्वला हुनुअघि ईही गरिदिए पुण्य प्राप्त हुने, कन्याले महिनावारी बार्न नपर्ने तथा “विवाहपछिको जीवनमा श्रीमानको मृत्यु भए पनि एक वर्षपछि रातो लगाउन पाउने” जनविश्वास रहेको अध्यक्ष श्रेष्ठको भनाई छ ।

नेवारी समुदायले बेल विवाहलाई परम्परा, पहिचान र धार्मिक आस्थासँग जोडिएको अनिवार्य संस्कार मानेका छन्। उनीहरूका अनुसार ईहीले कन्यालाई सुरक्षाको प्रतीकात्मक आश्रय मिल्ने, परिवारमा धार्मिक पुण्य प्राप्त हुने र परम्परागत संस्कृतिको संरक्षण हुने विश्वास रहेको छ ।