चितवनमा चैत्र २७ देखि २९ गतेसम्म दशौं अन्तर्राष्ट्रिय औद्योगिक प्रदर्शनी २०८२ हुने 

चितवन  । चितवन प्रदर्शनी केन्द्र भरतपुर चितवनमा दशौं अन्तर्राष्ट्रिय औद्योगिक प्रदर्शनी २०८२ हुने भएको छ । सोमबार चितवन उद्योग संघको सभाहलमा पत्रकार भेटघाट मार्फत जानकारि गराईएको थियो ।

चितवन उद्योग संघको आयोजनामा दशौं संस्करणको रुपमा यहि चैत्र २७ गतेदेखि २९ गतेसम्म हुने दशौं अन्तर्राष्ट्रिय औद्योगिक प्रदर्शनीमा नीजि क्षेत्रको विशेष कार्यपत्र प्रस्तुति सहित “नेपालको वर्तमान औद्योगिक अवस्था र भावी गन्तव्य” शीर्षकमा प्यानल छलफल कार्यक्रम हुने भएको छ । छलफल कार्यक्रममा वागमती प्रदेश सरकार, उद्योग, वाणिज्य, भूमि तथा प्रशासन मन्त्रालय, नेपाल उद्योग परिसंघ, नेपाल राष्ट्र बैंक, व्यापार तथा निकासी प्रबद्र्धन केन्द्र, उद्योग विभागका प्रमुख एवम् प्रतिनिधिहरुले प्यानलिष्टको रुपमा सहभागिता जनाउने कार्यक्रम तय गरिएको आयोजकले जनाएको छ ।

तीन दिनसम्म चल्ने प्रदर्शनीमा उत्पादन तथा सेवामूलक उद्योगको लागि उपयोगी हुने मेशिन तथा प्रविधिको प्रदर्शनी गर्ने, स्वदेशी उत्पादन (हस्तकला, गार्मेन्ट, निर्माणजन्य सामाग्रीहरु, प्लाष्टिक, प्रिन्टिङ, प्याकेजिङ, कृषि, उर्जा लगायत) का प्रदर्शनी तथा प्रबद्र्धन गर्ने र राष्ट्रिय तथा अन्तर्राष्ट्रिय बजारमा पहुँचको लागि वातावरण तयार गर्ने तथा विभिन्न नीतिगत बहस र प्यानल छलफल मार्फत स्वदेशी उद्यमशिलताको विकासको लागि मार्गचित्र कोर्ने विश्वास लिइएको छ ।

प्रदर्शनीमा राष्ट्रिय बजारमा सहज पहुँच सुनिश्चित गर्ने, स्वदेशी वस्तुको प्रवद्र्धनमार्फत आयात प्रतिस्थापन र निर्यात वृद्धिलाई प्रोत्साहन गर्ने, रोजगारी वृद्धि र स्थानीय स्रोतसाधनको अधिकतम उपयोगमार्फत स्वदेशी उद्योगको उन्नति र समृद्ध राष्ट्र निर्माणमा योगदान पु¥याउने, लगानीकर्ता र स्टार्टअपहरूबीच प्रत्यक्ष भेटघाट (बिटुबि) गर्ने, युवाहरूलाई उद्यमशीलताप्रति आकर्षित गर्न र स्वदेशी उत्पादनप्रति गर्वको भावना जागृत गराउन नेपालका सातवटै प्रदेशको स्टल सहभागिताका साथै प्रदर्शनीको मुख्य आकर्षणमा राष्ट्रिय आविष्कार केन्द्रको प्रविधि तथा मेशिनरीको स्टल र “मेक इन नेपाल स्वदेशी अभियान” मा आवद्ध उद्योगहरुको समेत सहभागिता रहनेछ ।

निःशुल्क प्रवेश रहेको प्रदर्शनीमा २५ हजार भन्दा बढी उद्योगी, व्यवसायीहरुको सहभागिता रहने अपेक्षा गरिएको छ । प्रदर्शनीमा स्वदेशी र विदेशी गरी १०० भन्दा बढी स्टलहरु रहनेछन् ।