साडीका चलेका ब्रान्ड 

नेपाली बजारमा प्याट्रन सिल्क, सिफन, जर्जेट, भेल्भेट, ढाका, बनारसीलगायत साडीहरू चर्चित छन् । 

नेपाली बजारमा बुटिक र डिजाइनरमार्फत जाने हो भने साडीको मूल्य २० हजारभन्दा माथि नै हुन आउँछ । प्लेन र सिम्पल साडी आठदेखि १० हजारमै पनि आउँछ । साडी तथा लेहेंगामा ह्यान्डवर्कअनुसार बुटिकको मूल्य बढी हुन जाने हो । सादी, भर्कन, कोरा, पोतेलगायत मिसाएर काम गर्नुपर्ने हुन्छ । महँगा साडीका लागि डिजाइनरले प्लानिङ धेरै गरेको हुन्छ, मिहिनेत धेरै लाग्छ ।

यस्ता साडीहरू प्रायः विवाहको मौसममा बिक्छन् । अझै बेहुलीका लागि विशेष साडीको अर्डर आउने गर्छ । कुन कलर म्याच गर्छ, कुन कलरले वास्तुअनुसार शुभ लगन दिन्छ, पृष्ठभूमिको डिजाइन, मण्डपको डिजाइन आदि हेरेर बेहुलीको साडी डिजाइन गरिएको हुन्छ । 

ढाका : ढाका हाम्रो मौलिक ब्रान्ड हो । विवाह र विभिन्न महोत्सवमा यो साडीको माग उच्च हुने गर्छ । त्यस्तै, सिफन, जर्जेटलगायत साडीमा ढाकाको बोर्डर प्रिन्ट गरेर लगाउनेको संख्या पनि ठूलो छ । मोटो साडी भएकाले यसको प्रयोग प्रायः जाडोमा हुन्छ । तर, अहिले बजारमा ढाकाका पातला ब्रान्डहरू पनि छन्, जो गर्मीमा लगाउन पाइन्छ । विवाह तथा विभिन्न महोत्सवहरूमा यो साडीको माग उच्च हुने गर्छ । त्यस्तै, सिफन, जर्जेटलगायत साडीमा ढाकाको बोर्डर प्रिन्ट गरेर लगाउनेहरूको संख्या पनि ठूलो छ । 

बनारसी : हाम्रो कल्चरअनुसार यो विवाहमा धेरै लगाइन्छ । त्यस्तै, परम्परागत समारोह तथा चाडपर्वमा पनि यसको अत्यधिक माग हुने गरेको छ । विवाहमा दुलहीले बनारसी साडी लगाउने चलनजस्तै भइसक्यो ।  कुमारीले पनि यस्तै खालको कपडा लगाउँछन् । यो हाम्रो कल्चरजस्तै भइसक्यो । 

जर्जेट : यो सिफनभन्दा अलिकति मोटो र खस्रो हुन्छ । तर, पातलै साडीको श्रेणीमा पर्छ  ।  ह्यान्डवर्क गर्नका लागि यो राम्रो र पारदर्शी हुन्छ । हाम्रो समाजमा यसको प्रयोग पनि अत्यधिक छ । 

प्याट्रन सिल्क : यो साइनिङ दिने र टल्किने कपडा हो । मानिसको ध्यान सजिलै आकर्षित गर्ने भएकाले यो साडी पनि धेरैले लगाउँछन् । यसले शीतल अनुभव पनि गराउँछ । हेर्नेलाई पनि शीतल फिल हुन्छ । बढी चिल्लो पनि भएकाले आकर्षक पनि हुन्छ । मानिसको ध्यान सजिलै आकर्षित गर्ने भएकाले यो साडी पनि धेरैले लगाउँछन् ।

नेट : नेट अति पारदर्शी हो । नेट लगाउँदा साइनिङ भएकाले धेरैले साटिन सिल्कको नेट लगाउन रुचाउँछन् ।

टिस्यु : टिस्युचाहिँ नेटभन्दा अलिकति मोटो हुन्छ । यो हेर्दा प्लास्टिकजस्तो पनि देखिन्छ । यो पनि पारदर्शी हुन्छ । 

सिफन : यो पहिल्यैदेखि चलेको कपडा हो, मुलायम र पातलो हुने भएकाले गर्मीमा यसलाई लगाउन सजिलो हुन्छ । यसलाई ड्राई गरेरजस्तो कलरमा पनि बनाउन सकिन्छ ।